La “fiction” sassaresa
di Gigi Noce

In d-un tiatru, veru, naturari
oggi v’è isthadda una recitazioni
cun tant’attori accolthi i’ la carrera
in d-un affarratoriu ecceziunari.

Lu Patiu di lu Diauru è l’iscena
dui fradeddi l’attori prinzipari
e poi tutta la genti di carrera
pa dibidilli e pa ciaramiddà.

Isceni d’althri tempi, la muglieri
di lu più forthi chi s’è dimmaiàdda
e li femmini tutti i la carrera
-Oih chi Katiuscia mori!…a zicchirrià

-No mori e no è murendi, è dimmaiàdda
pa l’emozioni e pa lu gran caròri
e no ipignìddi!, ciameddi un duttori
deddiri un ciaffu pa falla turrà.

E, a la pizzinna chi, disipiradda
ciama la mamma chi pari murendi
l’althri mammi li dizini affettuosi
-Jessica no pignì chi già no è nienti
istha’ tranquilla no ti disipirà-

E poi di tanti ciaffi e ciaffareddi
Katiuscia cu’ li càvani “abbrunzaddi”
si ni pesa e puru li fradeddi
fazini pazi chena più gherrà.

Parò lu fattu chi no m’è quadraddu
a me chi da vizinu era abbaiddendi
so’ tutti chiss’innommi americani
Kevin, Katiuscia e Jessica e “Consuel…a”
nomi chi mancu sani prununzià

No vi so’ più tutti li bedd’innommi
di la Sassari nosthra zappadora
nomi di re e di grand’imperadori
Mariantonietta e puru Custhantinu
e la jenti s’è puru immintigadda
di Caddarina, la più funtumadda
e pari no si voglia più ammintà
d’un Santu mannu, lu santu di Cicita,
chi in Itaria z’è posthu in serie A

Ah! La terevisioni…cantu dannu
l’ha fattu a chistha Sassari moderna
chi più no magna faba a ribisari
e si teccia cun jogurth e Nutella
vibendi comu i’ la telenovella
e no cumprendi chi in americanu
Kevin vo’ dì Gabinu, o poggapressu,
e chiss’innommu chi la jenti incanta
l’hani zerthu furaddu in Logudoro
chi a la cubertha li dizini …”Sa...manta”

(Masthru Gì) 26.07.01