…E camino mirende
s’orizonte ‘e sa vida
‘ue su tempus remunit ammentos!
Tottu a bida est torrende
in sa mente cansida
da’ s’edade ch’appoltu m’at turmentos.

Como sos passos mios
poderan sa càrena
in d-un’andanta lenta e fastizosa:
cun sos annos cumprios
s’est cumprida sa pena
de sa ‘etzesa pagu piedosa.

Ma sun restadas bias
che tando cussas oras
de gosu chi s’amore mi porriat:
millas sas poesias
torrende donadoras
de s’atza ch’in sas laras mi ridiat.

Issas, sos pilos canos
non mustran in sos chizos
ca no imbetzan ne su passu allentan.
Issas, mi dàn sas manos
in oras de fastizos
e che pitzinnu in fascas mi cuntentan.

E tando prendas raras
ponidemi sas alas
chi cun bois in altu torre in bolu
cun cuddas rimas caras
chi tantu onore in palas
m’an assentadu in annos de consolu.

Est una vida intrea
ch’in palpidos de coro
bos appo giuttu che samben in sas venas.
Como s’edade est fea,
ma cun bois, de oro
si tinghet s’intrinada de sas penas

e mi ballan de fronte
fozas de sole… attesu in s’orizzonte.

Segnalazione al XIII premio di poesia “Pietro Casu” - Berchidda 20 gennaio 2017