Ispera de onzi manzanu
di Vittorio Sella

Frameddas treme treme
in notes ventosas de agustu
si moven a chelu
in sos campusantos de muntagna.

E tandho unu disizu ti picat
de criaturas bivas
a luch’ ‘e die
in sas biddas muribundas.

E intendhes a s’arvorinu
oches chi mutin
a sas vinnennas de capitanni,
a ischerfiare in sos tinos
pupujones nieddos
bunnantes de sutzu e licore,
a pesare una domo
cun rena, granitu e carchina.
E àteras oches intendhes
chi mutin a intritzire
cuperturas de canna,
a tendhere cun manos sapientes
supra sa mesa allisata
sa pasta chi si uffrat in pane.

Frameddas treme treme
lìberas ides artas a chelu
in sos campusantos de muntagna.
E disizas biddas
chi ghissan de zoventute
in sos caminos de onzi sero.

Custa
est sa vida nostra,
ispera de onzi manzanu
de ozzas
de arvores novos
in alturas latzatas de oje.

3° Premio ex aequo versi sciolti al “Premio Biennale di Poesia in Lingua Sarda” di Bortigali