Iscunsunantzias
de Mario Nurchis

Mudamus aparentzia e sustantzia
pro sa timorìa de perdere
calchi cosa de nois.

Nos tapamus bene sas orijas
si calcunu tichirriat de giustiscia
E non faeddamus de amore
si nos costat.

Riimus a sa russa cando ‘ustamus
pro chi est leadu in giru
e puru si s’iscarzu nd’est birende
ildoamus e tragamus a tirare.

Pagamus sempre a su cumbidu
pro chie nde at de pius
e poi, ca nos cumbenit,
leamus sempre parte
cun chie tenet su potere.

A regula devimus lassare perdere
poveru e pedidore
comente puru su ruju bellu e mannu
de su semaforu.

E a sa fine de sa die
nos agatamus in coìle
gai, chena pastore,
e nos incorramus pari pari
brighende comente marcones
ca no amus atzettadu
s’amore
e-i sa rejone.