In sos ocros tuos
di Larentu Pusceddu

In sos ocros tuos
craros che gatta in amore,
ap'idu unu lampu de timoria
cando s'aradu at abertu,
in sa terra,
feridas de sambene pistu
ca s'arbada
ch’iscambedu at bintu,
at surcadu dilicada
luzanas dae su sole carpidas.

Su coro tuo muntagna
s'est fattu,
candidu che nie
e sa manu
fusu dilicadu,
forte
che suerzu in su buscu.

Sas laras che rosas purpurinas
parian immensas
che campos de papaurru
inue su tempus s'est firmadu
pro dare a tie, in tepiesa,
de amare, su donu.

E cando est ispuntadu
su secundu arborinu,
in sos ocros tuos,
craros che gatta in amore,
at brilladu su sole
e ap'idu su mare.

(Premiu ispetziale de sa zuria - "Romangia" Sennori 1980)