In sa pranta de sa manu
di Angelina Sotgia

Galu...
Ap'a chircare 'e tene
in sa pranta 'e sa manu
campuras de tricu
istajones pèrdias
amus galu a contare.

Ap'a isparghere in su sole
sa mia
sa tua
sa mudesa nostra.

Galu...
Ap'a intendere su lumene miu
su risu tù
dae sos fundales
an a ischidare sas dies
mareas pomposas
an a ballare
a su crarore 'e sa luna.

Galu jeo...
In sa pranta 'e sa manu
che recchillia
a mustrare una bandera
in fundu 'e terra arroccada
ma in su petus toccheddat
sizinde 'alu bisos
chin su prantu
intro sos ocros.

E...
Tra su chelu e sa terra
at a essere
s'addromu tù
a sinzale de luche
in s'istrintorzu 'e su tempus.

Su respiru tù
in su coro una prella
in sa pranta 'e sa manu
juch'istrinta un'istella.

Menzione d’onore sez. B al 9* Concorso di Poesia il Lingua Sarda “Viniscola 2010”