In ojos abbandonu
In coro disisperu
Vatin sas predas de sa vidda mia
Non bi at piu sonu
De pizinnos alleru
Jannas tancadas bi at solu ebbia
Sas predas sun pranghenne
Paren a mie nenne
A l’intennes sa voche de s’istria
Totu su ch’as lassadu
Sun solu ammentos de tempus passadu

A t’ammentas de me
A inoche venias
Paret narenne una crepitura
Cun su lizeri pe
Chi supra mi ponias
Chircavas nidos in carchi fessura
Ispantadu miravas
Sas teulas ziravas
Chircanne chene me aer paura
nemos mi zirat como
ne sos de oras e ne sos de domo

un veza ventana
aperta e isfasciada
cantos ammentos mi ponet a mie
inie una fulana
dae su coro amada
vidia semper si colavo inie
sena issa est partida
pius no l’apo vida
chisciai inumbe abitat e chin chie
solu linnas e muros
bi at restadu vezos e iscuros

domos pruite a mie
crudele mi narides
de s’abbandonu totu mi mustrades
s’amore e una die
serradu mantenides
e in dolente istadu mi lassades
nazemi vois ite
jeo naro pruite
partidu so e mi turmentades
como solu piantu
bos poto dare in custu campusantu