In memoria de Guerinu Fiori
de Mimmia Soro

Pensierosu e cummossu m’arreo
Addoloridu, tristu e, iscunfortadu
Meditende in su chi est capitadu
C’ancora Margarida non bi creo.

Su batoro de Austu ischertiadu
Hamus,de su ben’e, de su male
De s’interventu e de s’ispidale
De su futuru, present’e, passadu.

Forsis sa morte nos hada iscultadu
Ca in sa vida sa morte est presente
Poi de chimbe dies solamente
A Guerinu si che l ‘hat leadu

Su noe de Austu ite disgrascia
sa oghe trista velada de penas
Geladu mi hat su sambene in sas venas
E feridu su coro intro sa cascia.

Sa morte de sa vida este rivale
Sa piusu infame sa pius crudele
In ranzigore cambiat su mele
e-i sa festa in d’unu funerale.

Tres meses e pius c’hada passadu
E no resesso a mi rassegnare
A s’idea chi est bennidu a mancare
S’amigu caru,sinzeru e fidadu.

Oras serenas e bellos momentos
Hamus passadu umpare in armonia
Argumentende de sa terra natia
E infrischende sa mente de ammentos.

Guerinu, fid’issu unu galante
Rispetabile omine d’onore
De sa familia s’ispera e s’amore
De su tribagliu umanu unu gigante.

De sos amigos fidi amigu veru
Gentil’e, ospitale in s’acoglienzia
Che oro e prata, netta sa cuscenzia
Chi s’idiat su coro da s’esternu.

Non sese sola no,a lu pianghere
Ca in grave dolu est su coro meu
Sas lagrimas chi so versende arreu
A sas tuas chi si potan’annanghere.

Geleen(Olanda)