In incàscinos de sa notte
de Gigi Angeli

A incàscinos de sa notte
app’intregadu conas incheladas
in lampalughe ‘e dies
e dae cuntivizos irviadas;
a disbarattu como, est cuss’iscuru
a las mustrare jaras
in marettare insoro
a isciùcculu infra ‘e mudines suos;

umpare a sos mios
de pensamentu acuttant sas puppias
chi tòrrana cun coro, a cumpudare;
e sono sos abbojos irviados
truncados dae presse ‘e dispidida;
miradas
dae cambas de fundales istorradas;
su naschidorzu trémulu
de unu fiore ‘e campu
ma puru…
sa manu tènnara non bida
ind’un’àgnolu posta, a pedire;
o burras de simplesa
a ingullire loccuras e mattanas;

e in cussos incàscinos s’appagnant
sas andàinas de vida non trattada
in affannos e probàbiles recreos
irguidados dae presse ‘e gnagnarias;
ma b’at memòria!
e minutzat brumetzu
a resumu ‘e sabiesa in sos sentidos
a bortas reminidos,
a ispigàrende ancora
s’avvanzu de alores codiados;
de una vida
chi chietta si lassat graminare.

E incàscinos s’allàdiant
remunèndeche conas a disora.

 

Mentzione de Onore – Setzione B – Poesia in versos isortos Prémiu de poesia in limba sarda “A pes de Santu Padre” – VI Editzione Bortigale 16 de Sant’Andria 2019