Happo dolu

Happo dolu 'e sa ezza
appoggiad'a sa terra
chi pone(t) passittos
de istraccu tremore
po andare a pregare
a sa cheja luntana
un Ave unu Gloria
una Salve Regina.

Happo dolu 'e su ezzu
mugiadi in s'ischina
chi narad'ancora
'e sa gherra passada
e giovanos fortes
attrividos eroes
cunvintos de fagher
sa Patria unu chelu.

Happo dolu 'e sos fizzos
fichidos in terra
comente fiores
de Ispiritu assente,
comente sas fozas
de un'aivure rutta
segada a bistrale
e lassąda a siccare.

Happo dolu 'e su mundu
chi pared'un'innu
cantadu cun fossa
ma senza armonia,
oruladu, istraziante,
comente ticchirrios
ch'intendes su notte
e no podes drommire.

Nanni Brundu (Usini)

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!