Hapo su sole in su coro
de
Giovanni Maria Dettori

Est già interinende;
ma deo
hapo su sole in su coro…

Mi lu naran
sas campanas de Codinas,
boghes de dolore
in su mare de olia
chi palpitat de prata.

Hapo su sole in su coro…

Mi lu narat s’istella,
oju de chelu amorosu
subra sas penas umanas.

Avanzende est sa notte
e istudat
s’ultimu fi lu de lughe;
ma deo
hapo su sole in su coro…

Hapo su sole in su coro…

Manzanu, dae su monte,
had’a torrare s’albore.
Had’a torrare s’albore,
tantu pius bellu e caldu
cantu pius longa
e marigosa
had’a esser sa notte.

Had’aggiungher su sole sou
a su sole meu!…