Fuifunìddi d’isthèlli
di Gigi Noce

I’ li notti d’Aòsthu poi vidè
isthelli a mill’a milli abbuddrunàddi
lùzi in andèra, sempri riprandènti
e pensi a Ca’, i’ lu zèru, l’ha assintàddi

No sò uguàri pa lùzi o pa mannèzia
e pa l’ommu ch’è in la terra sò signàri
sò azzèsi in zèru da mill’e mill’anni
e vinni so uninguànti assai ipiziàri

So isthelli chi lu zèru lass’andà
cument’un pièntu i’ la notti sirena
fuifunìddi di prata ifrabinàddi
chi brìllani un mamèntu i’ lu farà

Sò l’ànimi di ca’ no ha pudùddu
vibì lu tempu e gudì giubintùra
e piègnini pa lu chi no hani aùddu

Eu puru, i’ lu me’ zeru, abìa un’isthèlla
chi riprandìa di lùzi assai ipiziàri
e la notti iprandìa soru pai me

Ma Eddu l’ha ciamadda affacc’affaccu
immèzu a l’althr’isthelli riprandènti
lassèndimi a lu bùggiu soru soru

E si pai casu in tempu d’isthadiari
burendi in zèru, abaredd’a vidè
fuifunìddi di prata assai ipiziàri
è la me’isthella...chi vo’ turrà da me

“figgiurendi lu zéru”

1) Polvere di stelle; briciole

Premio “Rosilde Bertolotti” 2006 Premio speciale “Cinzia Cossu”