Sole, frad’istimadu e sorre luna
Naraiat Frantziscu sende in bida.
Mancu cun issu però est finida
In custu mundu sa crudelidade;
Su Frantziscu de oe, est Santidade
In su tronu ’e Pedru pro fortuna.-

Sas peraulas Suas sun cunfortu
De sos aflitos e disamparados,
Bidindesi da issu carignados
Creo, chi lis abrandet su dolore,
Semenat isperantzia e amore
Paret in terra su Cristos risortu.-

Non cheret chi lu giamen Santidade…
Abbratzat e carignat a dognunu.
Però, tando sos Santos chie sunu?
Sun ateros potentes de sa terra?
Chie semenat morte, lutu e gherra
E Frantziscu nos narat chi l’est frade…

It’est s’istella Sìriu in lugura,
De fronte a issu chi est unu sole?
Pregat e sufrit pro s’umana prole
Sos bonos ’ideales non traighet,
Dae su Vaticanu beneghet
Cant’at criadu Deus e natura.-

Già semus fizos de tot’unu Deus
Ma non nos instamamos pari-pari…
Chie tenet siddados e dinari
Est tratende su poberu che cane,
Su pregare, de s’anima est su pane…
Ma su corpus, s’intendet sempre peus.-

Si muden in salude e in recreu
Totu sos males de s’umanidade,
Su frade chi s’istimet cun su frade
Comente pregat custu Santu in terra…
Chi no at a frimare dogni gherra
Ma est su Paba de su coro meu.-