Ue sezis currinde cun lestresa
sicas pedrales fozas andantanas?
Ca bos est pressighinde sa ‘etzesa
azis mudadu su bellu colore
e bos est arrimadu su motore:
sunt torradas sas carres moddianas.

Ue andades totas a muntones,
sena frimmesa, mannas e piticas?
Bos ispalghet su ‘entu a muliones,
bos ispravinat peri sas istradas,
fozas lizeras, atrobioladas,
in tzintziris che mannas bobollicas.

A bos bier in poder’e sos bentos
mi dat s’idea de malos signales:
est mancande sa fortza, sos trumentos
bo’ che sunt leande a s’ultima dimora,
como paret chi siet bennida s’ora
de ingrassare sa terr’a binzales.

A torrare a s’allegra zoventude
sun ammentos de antiga bellesa:
su calor’e su sole, sa salude,
sa mama chi a bois at allatadu
paris a dogni sorre ch’ at pesadu
funt motivos de ‘antu e cuntentesa.

Poninde fatu a s’annada mala
tempos metzanos sezis connoschinde
ca su ‘entu bos sulat a dogn’ala;
fozas isololtiadas, passizeras,
imbatinde a sas ultimas anderas
a sos peus alientos sucutinde.

Cuddu distinu chi no’ faddit mai
totucantos che leat a igue.
A bois puru bos portat de gai:
bos illudit e bos istracassat,
bos coglionat e posca bos lassat
cun cussu giogu de su pesa-rue!

Ue ando no’ l’isco, bi peleo…
Una foza mi parzo finas deo!