Fide de isettu
di Minnia Pani

SA FAMILIA

Semenadu aia in su giardinu
Ranos de oro, isbrottados sunu:
los contivizaia a unu a unu
fin’abbados cun abba ‘e suore
daia madrighe netta ‘e amore
si suian mamiddas de su sinu.

Creschidos custos ranos semenados
Sun carres pastoridas fizos mios
Ringratzio su Segnore, tottu ios,
e bos isetto fizos tottu mannos
binchende cuss’ ismentigu ‘e sos annos
ammadrigo abbratzos indeorados.

Fizos mios, deo isett’ innoghe:
su coro si m’abberit che lumera
ma mudat in tristura cuss’ ispera
intzitende sa vide chi aia,
inue est finida sa familia mia?
E sa tristura mia est chentza ‘oghe.

Pipiso de amore cuss’ ispera
In d’ unu ispiju garrigu ‘e ammentos:
mi paren’ annos tottu sos mamentos
de isettu, pro poder’ agatare
sa familia unida totta umpare
che lugorosas tramas in s’ aera.

Passan sa dies: sun mudas e tristas
E mi so imbetzada, gai est sa vida,
gitto che prata sa conca incanida
attuddada de semen’e amore
s’ anim’ imboligada de dolore
non chentza carchi lagrim’ in sas cristas.

In s’ ispiju lughidu de mattana
Bos bido risulanos e minores
‘arrios de afficos e de valores
Perdonare bos devo caros fizos?
No isettedas a m’ ider’sos chizos
A tando….a su tocu ‘e sa campana.

Inu’ est cuss’istima e su decoro?
Su decoro traìttu ponet pizu
Mi faghet aurtire su desizu
Cun dun’ ispinta mann’ intro su coro.

SEGUNDU PREMIU TEMA: SA FAMILIA PREMIU LOGUDORO OTIERI SU: 2002