Fantasia.

Puite mi naras ch’est fantasia
custu narrere, cust’iscriere
custu ponner su coro in campu netu.
Non bides,
cantu coragiu b’at
in ogni versu, in ogni rima?

Puite mi naras ch’est fantasia
custu fagher poesia, custu faeddare,
non intendes,
pro chi tantu che sias atesu,
unu sonu ’e campana,
una frina lebia e dulche
chi non tocat sa cara
ma iscanzat su coro a milli e milli cantones?
Chi naran de vida e vida cheren
e vida mustran,
in male e in bene
coglinde giuntas de piantu
ammentende cantu cheret ammentadu.

Narami si no est poesia
s’amore ch’intendes, su sole chi t’iscaldit
s’aera chi miras e sa terra ch’atraessas.
O no est poesia cand’a tie astringhes
chie amas e chi tantu disizas?
Narami it’est su giogu, su risu
de sa criadura ch’as in bratzos?
E cando ries o acua pianghes
o cando de cant’as ti cuntentas,
o a Deu pregas,
abberu, ti paret fantasia?

Como proa, si cheres, e si podes,
a mi contare it’ischis, it’intendes
it’isperas, ite cheres…
Naramilu,
cantu e puite mi ses amigu.
Narabilu a fizu tou cantu li cheres bene.
Nara cantu amas sa vida.
Cunfessa cantu times sa morte,
ma non mi nelzas ch’est fantasia…

Franco Piga (Romana ‘SS’)
su 6 de Sant’ Andria 2007

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!