Fadadu est lompidu s'olvidu
di Larentu Pusceddu

(Paristoria baroniesa)

In s'ispanu casteddu
supra sa rocca groga
sa lugerra est allutta
a sas istellas craras de austu.

Dae su mare, una nae bardanera,
osserbat su lucore tremulosu
chi daet formas indistintas
a sas pupas che tentan sas muraglias.

"Inie b'est sa Reina!"
Pensat arruddidu su Moro Beduinu
cun sas bestes de seda indeorada
e cun in petus sa mesu luna.

Sa Reina bianca nida,
s'Anzonedda bramada
passizat accisada in s'aposentu:
"Mama mia su Moro, ohi su Moro!"

Brincat su Saracenu e rucrat su mare,
saddiat pischinas e dunas
e s'inimicu non l'idet.

Fadadu est lompidu s'olvidu
a unire su samben e sas carres,
ma sas Janas presumidas e bundadas,
bidendelos si cuan aturdidas
e derrotas s'amore frastiman…

In pes de turre si pasan duas ranas
unfrande sas gulas biscaccadas
e pensan a su cras chi las isettat.

(Mamoiada: Menzione 2003)