Est itzurpu custu tempus
de Sandro Chiappori

Nuis arvas
stùdant s’ùrtimu soli
e is matas àbidant
umbras sculadas faci a scurigadroxu.
Mericeddu scitorau icustu
chene bentu e chene chèscias.
Est itzurpu su tempus…

Arruit sa noti a pimpirinus de cilixia
cuat is isteddus studendindeddus
asut’’e lentzorus fridus
ch’imbùssant mudoris e daboris.
Ma est itzurpu su tempus…

Is terras manixadas
pòrtant fragu ‘e làmbrigas
e cinixu aspu de bisus.
Pastoris e massaius
cun manus ammatzocadas
pòrtant isperas cilixadas in sa ‘uca
e in logus stesiaus pràngint.
Balla, est itzurpu custu tempus!

Intre is lavras siddadas
si nd’arrescit
sa chèscia de unu poeta
chi in su trèmini ‘e sa noti
boddit unu steddu
ancora allutu de ispera.-

E’ CIECO QUESTO TEMPO – Nuvole bianche/ spengono l’ultimo sole/ e gli alberi respirano/ ombre disfatte verso il tramonto./ Gelida sera questa/ senza vento né lamenti./ E’ cieco il tempo…/ La notte cade in briciole di brina/ nasconde le stelle spegnendole/ sotto fredde lenzuola/ che avvolgono silenzi e dolori./ Ma é cieco il tempo…/ Le terre lavorate/ hanno odore di lacrime/ e acerba cenere di sogni./ Pastori e contadini/ con nodose e livide mani/ portano speranze ghiacciate nella bocca/ e piangono in posti diversi./ Oh cribbio, é cieco questo tempo!/ Tra le labbra serrate/ rimane soffocato/ il lamento d’un poeta/ che sul ciglio della notte/ raccoglie una stella/ ancora accesa di speranza.-

2° PREMIO al Prèmiu ‘e Poesia in Lingua Sarda “SABORIS E COLORIS DE ISCROCA” - 2012 “Poesia scapa”