E su corpus meu
di Larentu Pusceddu

A sa morte
ite apo a esser jeo?
Arbore siccu
chena umores.

Sos carinnos de amore
dados a carres disizosas
e sas ranchidas suferentzia
patidas in vida,
sas luches e colores
osserbados in allegria
e sas miradas ardentes
dadas a sas bellesas,
sas paraulas nadas
e sos cantos de amore,
sos abratzos calorosos,
sas fainas
e sa passione umana,
sos palpitos de zoventura
e sos affannos
de sas primas istimas,
sos sartios de amore
e su semen fecundu.

Totu su ch'est dignu
in sa vida
l'at a godire sa terra.

E su corpus meu
prudicadu e mermidu
at a dare sa vida
a medas frores.

(4° Premiu - "Meilogu" Puttumajore 1977)