Donami' sa manu fradi
de Ida Patta

Mari, mari assassinu, disappietau,
t’as ingurtìu moddi e tostau,
lassendi degolu e prantu!
Creaturas moddizzosas,
in cudda playa trista
apparicciànt s’artari…
Su mundu intreu ant istrullau!
Cun s’ispera in coru,
e sa bertula pringia de sonnus,
a trumas si fuiant po sa libertadi.
Culonàos e surraus
che iscraus de su fadosu…
Destrossa preneta dus cassàda!
Boxis ispramadas
pediant agitoriu
in cuddu mari nieddu de Lampedusa.
Donamì sa manu fradi:
angiulus de sa terra,
intregant sa vida a sa sorti
po sarvai is fradis
imbussaus de s’unda traitora!
Toccus de agonia,
baullus a chentus
de òminis e pipius
sene identidadi.

Moi, tui, luna ermosa,
tistimongia muda
de is males de sa terra,
incaradì in sa fentana ‘e su celu,
frandiga cun d’una ninnia
is pipius dormius
in su barzolu de su mari.

Segnalazione di merito alla 5^ edizione del Premio di Poesia "Quartucciu"