Disaffìu
di Gianfranco Garrucciu
(Primo Premio Montanaru Desulo 2009)

Illa custera ruda
undi so azzi e bicchi
curri gjugna notti
grei lu lamentu
e dilicu lu ‘entu
n’arreca da lu mari
lu nuscu
di lagrimi e di pientu.
No v’à ne cala
o nidu d’abbentu
ch’aggja focu di debbi
a illuminalli
chì lu curaggju mintuatu
illa me’ gjenti
spint’à l’anticu faru
di l’accasaggju.
E a lu tastu, illu buggju
fantasimi palduti
poltani
li balchi di la molti
in cilca di discansu
‘n tarra angena
cussì chi di la solti
proani l’agghiriu
e di lu mal passà
dulori e pena.
Crudu chistu disaffìu
chi no scioddi catena
e lu tempu a vinè
brama una spunda
dubbicosu e inceltu
illu traggjà
cussi comu l’unda
contru, chi ‘nvanu,
impidi lu suprà.

( Distarrati )

sfida

Nell’aspra costa/ frastagliata/ corre ogni notte/ angoscioso un lamento/ e delicato il vento/ riporta dal mare/ il profumo/ di lacrime e di pianto. /Non c’è cala/ o dolce nido/ che abbia fuochi di sterpi/ a illuminarli/ perché il rinomato coraggio/ della mia gente/ ha spento l’antico faro/ dell’accoglienza. /E a tentoni, al buio/ fantasmi perduti/ portano/ le barche della morte/ alla ricerca di pace/ in terra forestiera/ cosi che della sorte/ conoscono la sofferenza/ e di quell’avventura/ il dolore e la pena. /Cruda questa sfida/ che non scioglie alcuna catena/e intanto il tempo a venire/ brama una sponda/ dubbioso e incerto/ nel trascinarsi/ così come l’onda/ contraria che invano/ impedisce il sopravanzare.