Dae su primu istante
di Pedru Pisurzi

1.
Dae su primu istante
chi deo pro accasu ti miresi,
fattu luego amante
serviredi costante proponzesi;
fattu luego amante
proponzesi serviredi costante.

2.
Sempre pensende in te
isto dies e nottes, bella dea.
E non bi hat in me,
idolu meu, cre', atter'idea;
e non bi hat in me,
idolu meu, atter'idea, cre'.

3.
Dae cando in turmentu
passo su tempus tristu e affannosu,
pius unu momentu
su coro no hat tentu de reposu;
pius unu momentu
su coro de reposu no hat tentu.

4.
Si poteren sos muros
de s'apposentu meu faeddare,
ancora chi sun duros,
affettos puros dian relatare;
ancora chi sun duros
dian relatare affettos puros.

5.
Dìana narrer tantu
chi s'affannan pro te sos ojos mios,
chi dae intantu intantu
de lagrimas e piantu forman rios;
chi dae intantu intantu
forman rios de lagrimas, e piantu.

6.
Tue ses su tesoro,
tue ses su bene meu, e mia vida,
a tie solu adoro,
a tie tenzo in su coro imprimida;
a tie solu adoro,
a tie tenzo imprimida in su coro.

7.
Pro te graziosa Elena
supporto tanta pena, e tantu istragu,
appenadinde appena,
sa cadena allezzeri calchi pagu;
appenadinde appena,
calchi pagu allezzeri sa cadena.

8.
Non superba ed altiva,
non ti mustres no, bella, disiguale:
si cheres ch’ ‘eo biva
mustradi cumpassiva e liberale;
si cheres ch’ ‘eo biva
mustradi liberale e cumpassiva.