Coppia Amiga
de Sarbadore Enne

Sun barant'annos chi t'apo connotu
Luisi cando fimis zovaneddos
E ambor duos a pilos nieddos
Deo che tue lor zughimis tottu

Oe ambos che semus ispilidos
Ca sa capilladur'amos perdidu
Però semus ancora de sentidu
Sun sos sanos prinzipios collidos

Intro 'e conca los amos serrados
Poi chi carchi male amos sufridu
E tempus feu ambos amor bidu
No essende naschidos fortunados

Nos amos una femina leadu
E ambor duos connotos maridos
Da su rest'e sa idda bene idos
Tue cernente deo ser fizadu

E amos tentu in sorte ricos donos
Dae sa bella e mama natura
Ca pro sa nostra origine futura
Namos chi amos tentu fizos bonos

Sor fizos c'amos paren gioiellos
Ca los connosco paren tottu sanos
Cuasi tottu an s'aneddu in manos
E sos nebodes pura sunu bellos

Duncas cani Luisi cun Maria
Sa etzesa faghide groriosa
Sempre cuntento isposu e isposa
In paghe santa e bon'armonia

Deo so carchi ort'adoloridu
C'apo passadu meda tempus feu
Ma bellegai cun s'azudu e Deu
A settantases annos arrividu

E peso ancora chito e fitianu
Ca tenzo carchi cosa de acudire
C'apo sos porcos los devo pulire
Magari siat pagu onzi manzanu

C'apenasa de lardu o de pancetta
Mi servit de azudu a sa memoria
E faghet benner apena e boria
E daede ispuntu a su poetta

E daghi enit cust'ispuntu a mie
Chi mi ponzo a faghes poesias
No iscrio sar cosar malas mias
Ma Luisi iscrio finz'a tie

Oe so solu solu in domo mia
Pinuccia er bessida pro dovere
Tu'in domo as a tenner sa muzere
Sa bella insuperabile Maria

Bos auguro una bone etzesa
Fintzas a essere betzos pedrales
E de podes contare chentu annales
Cun saludu amor'e cuntentesa

Istadebos bene - saludos a tottu

Sarbadore (zennarzu 2018)