Conta tue
de Peppe Montesu
1
Conta tue c’as vidu suppuzzadas
in nottes de istiu lucorosas
contannos tottu ammentati cosas
s’ intro su coro las jucches cuvadas
ammenta rimas intesas cantadas
cun vhoches raras e armoniosas
ammenta a nois de annos passados
usos anticos e immentricados.
2
Conta de sos vheranos de s’altura
e de manzanos in mandra murghenne
de sas siccagnas chi ti fin brujenne
in sos istios prenos de calura
conta de brigas pro una crejura
e de su sambene a rivos currenne
no istes mudu tottu a noi nara
de custa terra amada nostra cara.
3
Conta de temporadas in cuvile
de tempestas de abbas e de ventu
de sa nottes d’iverru a fogu tentu
a ancas juntas accurz’a s’ochile
contades eminas de trattu gentile
non cuvedas a nois cuss’ammentu
a fizzos nostros devimus lassare
tottu su ch’imus pro si l’ammentare.
4
Conta massaju de sas vidathones
de sas terras aperta chin s’arvada
de sos tricos in terra semenada
canno cantavas chi milli puzzones
de su benenu c’ancora ti pones
pensenne galu a sa mal’annada
azzuda a noi sardos tottu cantos
a li dare a sos tempos giustos vantos.
5
Conta nos tue vezzu pili canu
de su chi as passadu in pizzinnia
racconta a noi sa tua nennia
de su c’as vidu e toccadu chin manu
ischi tue s’ammentu no est vanu
ca est ammentu e sa sarda zenia
cudda chi tantos cheren cancellare
contas nos tottu pro noll’ammentare.

6
Contade sardos chi azzes s’ammentu
tottu contade chin sa limba sarda
facchide prestu s’ora no est tarda
allughide onzi coro a fogu tentu
pro chi torret cust’isola apposentu
de zente forte chin coro e testarda
torra sa conca mantenide arzada
pro esser de nou zente rispettada
7
Contade vois predas c’azzes bidu
de cust’isola nostra sa naschida
vois chi incantada l’azzes vida
nazze nos tottu su c’amus patidu
umbe sos coros amus affortidu
cal’est’istada sa manne ferida
pro chi tottue si potat ischire
su chi nos faghet ancora suffrire.
8
Contade ca est s’ammentu c’amamus
C’a nois mancat che abba in istiu
prenade vois custu siccu riu
pro connoschere sa terra umbe istamus
ca custu est unu bene chi lassamus
pro chi non siat unu invanu adiu
de su populu sardu onzi istoria
restet eterna imprimida memoria
9
Cantade predas ca bos an’ offesu
sos chi nos ana sas venas siccadu
sos viles chi non c’ana canzelladu
su modu sardu e nos’an vilipesu
contami tue chi non ti ses arresu
nara proite ti an maltrattadu
sighide sardos sa nostra amistade
e tottu su munnu la contade
10
Conto custu dissizzu chi appo in coro
pro chi non siat a un’ala postu
siat su sardu cumbintu e dispostu
a cunservare su sou tesoro
ca est s’ammentu chi valet che oro
in su caminu chi diventat tostu
si s’istoria nostra connoschimus
torramus fortes comente lu imus

Agustu 2014