Concas de janas
de Tonino Fancello

Naramilu...
Sardigna ca cudd’era
f’it prena‘e disizu
e d’isperanzia...
sa terra chin sos montes
sa sustanzia...
sos cantos de sas janas
istigantes...
nuraghes chin sos dolmen
e zigantes...
t’an fattu in d’una carta
isula vera.

Naramilu!....
o Sardigna chin su coro
cantos miliares....
contande t’an bidu
cantos...
cartazinesos t’an feridu....
e romanos...
gherrande a ispada tratta
cantos aragonesos an chistidu
limbazos
po mescrare custa ratza
‘e doppo s’ispagnola dolorosa
lassandeti sinzales d’una tratta.

Naramilu!.....
o Sardigna a mente crara...
cà fin menzus brigantes‘e balentes
in s’antiga Barbagia sa pius rara
de sas faidas de como frequentes
naramilu!.....
cà curro a caddu in Giara
intremesu addiscros e padentes
fist’aspirande a reina che sennora
de s’isula de macra amajadora.
chin sos fizos de coro prus ardentes.

Naramilu!...
o Sardigna in vida‘e morte
cà nd’iscurtan
da-e innedda antigu cantu
sos emigraos.....
chi’son’in fora tantu....
cheren torrare a bide’in su mementu
de paches‘e amores unu mantu.

Primo Premio Osilo Anno /2009