Como, in cust’ora mancat sa pintura,
sa oghe chi fit solita cantare
muttos d’amore pro no ismentigare
sos tempos de s’amada gioventura.

Mancat sa manu, s’oju in cumpagnia,
o sa mirada in chirca ‘e unu carignu,
su pettus palpitante, e unu disignu
fattu cun sa prus diliga armonia.

Mancat su sole, e tortu est su camminu,
so che piseddu solu a prima essida,
sa risulana boria ch’est finida,
creia in menzus sorte, amaru ostinu.

Sa soledade est bona e mi preguntat,
disposta che un’ amiga a m’iscultare,
e deo li conto de su meu penare
sena faula peruna e sena aggiunta.

Custa est sa vida, bella e traittora
che femmina chi mustrat coro amante,
da poi iscumparit, passadu s'istante,
che neula a prima lughe de s’aurora.