Comente naras tui
de Sandro Chiappori

Gei dda seu biendi
foras de sa ‘entana
cabendi lena
me in sa cresura ‘e frùschiu…
ma no ti pongas pensamentu
innantis de obrèsciri
at a lassai de niai…
at a fai prus pagu frius
a su primu soli!

Una dì a su spibillai
nosu eus a essi luxi
e is chi immoi
funt ispinas de cresura
fridas de nii
ant essi froris.

No at essi cosa ‘e pagu
trampai su tempus
e cust’àteru ierru nostu
chi ancora de prus
s’at a immurrai is pilus…
ma eus a fai
comente naras tui:
notesta eus a abetai s’obrèsci
e gei ti ddas ap’a ligi
cussas curbas de poesia
chi ariseru apu scritu…
po tui!
Ma immoi beni…
ca si sfridat
su pani arridau…

COME DICI TU - Sì, la sto vedendo/ fuori dalla finestra/ scendere leggera/ sulla siepe di pungitopo…/ ma non preoccuparti/ prima che albeggi/ cesserà di nevicare…/ farà meno freddo/ al primo sole!/ Un giorno al risveglio/ noi saremo luce/ e quelle che ora/ sono spine di una siepe/ gelide di neve/ saranno fiori./ Non sarà facile/ ingannare il tempo/ e quest’altro nostro inverno/ che un pò di più/ c’imbiancherà i capelli…/ ma faremo/ come dici tu:/ stanotte aspetteremo l’alba/ e te le leggerò, vabbé,/ quelle strofe di poesia/ che ho scritto ieri…/ per te!/ Ma vieni ora…/ perché si raffredda/ il pane abbrustolito…

2° Premio - II Edizione del Premio di Poesia "Santu Mauru" – Sorgono 2013