Franziscu Mannu (1) ghjusta l’at pesada
“s’isterrida” (2) chi ‘jabbat sos barones
ma mudas son sas cambas de “torrada”
ne b’at boltada ancora in atziones! …

In cuddos tempos nos han’ bidu irbrattos
chenza podere pro nos tzinnigare,
no b’aimus manch' ìte mandigare
cannuncados e da’ trabagliu isfattos;
rejone no b’at como ‘e baliare
sa “malasorte” ‘e semper caratzada!?!

Franziscu Mannu ghjusta l’at pesada …

Bind’at de “tirannia” ‘e donzi iscera
ca donzi tempus benit cun sa sua …
si cheres, oe, ti la dana a cua
e chenza ‘nde cumprende’ sa manera
ti lassan siccu e pistu chenza fua;
leendeche trabagliu e sas rejones.

“S’isterrida” chi ‘jabbat sos barones…

Matzones abbramidos chei s’orcu,
han cambiadu 'entinu cun sos annos
e cantu dana a su populu affannos,
tantu ponene lardu che’su porcu;
sighende a nos tramare sos ingannos
pro bardanare a “resorza corcada” ! …

Franziscu Mannu ghjusta l’at pesada …

‘Jompen'ancora malos furisteris
e si los ponen' “ìssos” sempre in sinu …
in pedde nostra apparinant terrinu
incunzende sa paga ‘e sos “osteris”
chenza b’istare tantu "a bie’ binu";
e nòis a pes a mùru in cabones!

“S’isterrida” chi ‘jabbat sos barones …

De no nd’esse’piùs colonitzados
est tempos chi b'aimus attibbidu ! …
ma bìu ancora est e no cumpridu
su " ‘essu " chi nos lassat cogliònados
da’ chie custa terra ha partoridu:
"barones" cue! ... a cara iscaratzada;

Frantziscu Mannu ghjusta l’at pesada …

e “paschene” !… a isciappu in parlamentu
cun bullittinu e "tratta de patitta"
ch'est sa matessi de sa frìmm' iscritta
chi ponen' pro mantenne' su talentu
de sa ciappa, zoada cun bullitta;
pesendende sos "roncos" pro sermones.

“S’isterrida” chi ‘jabbat sos barones …
Franziscu Mannu ghjusta l’at pesada
ne b’at boltada ancora in aziones:
e mudas son sas cambas de torrada!

1) Franziscu Ignaziu Mannu – poeta autore
della “marsigliese sarda” – Su Patriottu …
2) Procurade ‘e moderare / barones sa tirannia -

Premiata con il terzo premio (sez rima) nel concorso di poesia "S. Barbara di Sinnai" ed. 2016