Chirco su sole
de Giovanni Fiori

Caminos chena tempus. E irminas
nidas inoghe e chena sinnu incue.
Passos de chentu lunas in sa nue
e campanas cun s’oro giaru in grinas.

A tie, passizeri ’e pagas dies,
su fagher paret in su fadu iscrittu…
E s’altzas ojos a su biaittu
ti seras cantu tottu e nudda sies.

Peri pedras de samben e suore
isciau e donnu puro pascher dêse…
Si punnas pius altu ’e cantu crêse
sònnias dìccias e ciocchis dolore.

Fritzas de lughe tottue ch’has missu
lassende iscurigores a insegus
chen'ischire chi s’àteru est in tegus
e tue - a proe tou - ses in issu.

Non t’ispanten beranos aurtidos
pro fagher anta a bentos a s’imbesse!
Contivizende inguglionia e presse
pedis ondra a rosales isfozidos.

Ma deo chirco su sole in atunzos
indeorados... E chimas chietas.
E a sos berbos betzos de profetas
isturdidos, lis mustro da-i punzos

sas veridades mannas ch’has connottu
a las porrire in sas giannas ch’abberzo.
E s’ischire cherferas ite cherzo
e chie so: pregunta a tie etottu.

So poete! E redossu hap’a mantenner
sa tzotta in manos... Gai canto e ando
brighende cun su mundu, fintz’a cando
sas dies ch’hap’in s’ànima han a benner.

Primu Premiu - Rima a tema impostu in su XXXI Premiu Logudoro - 2012