Chie est s’intelligente?
di Renzo Rosa

Mai una die a iscola so andadu,
ca su destinu meu, fuit sa campagna
ma de iscrier deo puru in sa lavagna
hai cantas bortas l’apo, disizzadu!

sa pizzinnia ch’est passada gai
dae una, a s’attera pinnetta
vivinde che tontu analfabeta,
su tempus bellu chi non torrat mai.

Dae anzianu, ma cun decìsione
s’idea b’apo postu a istudiare
po poder finalmente abbandonare
sa matza, su picu, e su marrone

e cun su pagu inari risparmiadu
comporadu m’apo unu computer
po imparare e po poder discuter
comente faghed unu laureadu

appo imparad’a usare sa tastiera
su maus, e s’iscanner po copiare
finestras de aberrer e serrare
in su monitor cun manu lizera

como, giro in camisa e in colpette
ca isco iscrier leggere, e contare
e bo lu narzo chi mi potto ‘antare
de aer viaggiadu puru in internette

pero in domo non bi tenzo inu
ne nughe ne castanza ne ninzola
est bellu meda a fagher un’iscola
ma troppu boidu est su comasinu

sa froffighe a su crau est appiccada
su tzappu tott’ iscontzu e ruinzadu
e in su tempus, ch’apo navigadu
sa inza unu buscu est diventada

po cussu cras manzanu apo prommissu
chi a binza su computer che lu leo
ca si s’intelligente, soe deo
da como in poi, la tribagliat issu!

Paule 2005