Chelzo
de Augusto Piras

A boltas m’’iso chi m’epan ligadu
in-d-un’inserru iscuru chena ’essidas;
b’at tantas giannas ma sunt intzoidas
non b’est de las aberrer sa manera;
solu m’agato e surdu in cust’aera
in tristos pentzamentos acorradu.

In custu istrampu solu che so dadu
sighinde faltzos bisos e balanzos,
sena s’oretu a sos males istranzos,
a su bisonzu chi su mundu atogat
cun tanta zente chi pius non si ch’’ogat
cascos, piantu, dolu e malu fadu.

Ansidu chilco trapas in su muru
astradu e grae de sos sentimentos.
Chilco s’azudu de frinas e bentos
ch’a melmos m’’atan su nuscu ’e s’amore
chi totu movet in gosu o dolore
ispalatende su chelu pius duru.

Sas foltzas muto pro s’ùltima proa
de innitiare sas druches funtanas
a m’ifriscare sas dies luntanas,
anima, coro e sentidos serenos
in su patire sos males anzenos,
ca paghe bramo in cust’ultima doa.

Chelzo torrare a sas dies coladas,
a s’allegria ‘e sa zente sidida
cando s’at bidu chi s’abba est bessida
da cussu putu chi fut trassicadu:
cun pagos soddos bi l’amos torradu
a lis infunder sas laras trapadas.

Chelzo lassare sos pinzos pulidos,
totu a fiores de bonas fainas,
dende un’amparu a sas zentes mischinas
chi in custa vida, pro mala foltuna,
no ant gosadu de grascia peruna:
benzan pro totu sos bonos sentidos.

E benzan nidas sas ultimas dies,
sen’umbras malas ne dolu o pïantu
a mi drommire iscultende su cantu:
“Bae in bonora, in su chelu che sies”.

Secondo Premio - Cuncursu de poesia sarda “Antoni Piludu” Annu 2012