Che a Lardajolu (maschera carnevalesca antica)
de Salvatore Fancello

Po su bisonzu e non po balentia* ---------------------------* per neccessità e non per gloria
chin su garriu 'e sas nottes in camminu,
chin su coro andalusu e peregrinu
so andau po sa pache a pedulia.

A 'nue 'ortan sos arcos de s'incantu
a cudd'ala 'e sos montes sas lucuras
e in s' aèra si perdene tristuras
de mutrias de dolore e de piantu.

E s' anima apo dau po manizu
a cuddos derelittos chene 'oche
po la pesaren arta dae 'noche
peri chelos de ghessa* e de michizu*. ----------------------* Di contestazione *e dissenso

E prima chi cantaret sa corranca
e lomperet marzane a sa chirina* ----------------------------* recinto per lo svezzamento dei capretti
in palas m' apo postu sa 'ervechina.
e a chittu ap' istrintu sa letranca* ---------------------------- * gonnello maschile del costume

de 'uresi filau a dua piza,
e unu sereniccu po cuerru,
po non time sos meres de s'iferru
e frammas de su 'ochu chentu miza.

Ap' istudau sos puttos de Pandora* -------------------------* Strega buona, guardiana dei pozzi
chircande s' abba frisca 'e sas ideas
hap' iscuttu sa marra a cuddas creas
a 'nue ap'a torrare chene s'ora.

E lizeri m'han juttu chene pesu
milli frinas in cada camminera
e m'han lassau tottu sa carrera
tra chelu e terra sempere suspesu.

Gasi che unu rambu 'e neulache* ----------------------------* oleandro
peri sos rios peri currentinas
so' andau ponende raichinas
in sos poios e settiles* de pache. -----------------------------* pianure

E oie chin su solitu mermeddu* ----------------------------- * preoccupazione
e chin sos passos de s'ampul' e fala
so andande torra po s'annada mala
chind' una cara 'e lardu 'e tittieddu*. ------------------------* lardo e fuliggine

Tucat su pedidore a “ boe solu!”
In custos tempos de sa terra mia...
Po cantu b'hat in ziru poesia
fortzis so jeo ...cuddu Lardaiolu!