Catza russa.

Canes abramidos,
cumpidende,
silvas e fieros rocalzos,
e canalzos truvende,
in semidas abudadas,
e innidas tirias
a tupas de rù abratzadas,
a costoire
abbuadas de masolzas assustadas,
a su nudda arrumbadas
isetende,
canes e truvas avantzende,
pro chi currana
a s’abboju cun sa sorte,
ue a trampa,
sa morte an’aprontadu.

Milla sa posta !
Acollu su tiru !
unu frusciu ‘e balla !
Faddidu !
Curre !

Curre, no t’imbares,
chi oe s’amos gana,
in su fogu assamos pane,
e casu,
si chereimos pro aunzu.

Intè,
intè sos canes
isalenados,
e sas boghes,
de chie los at mandados
in chirca ‘e disaogu.
cun su giogu
chi aters boltas nos at atatados.

Franco Piga (Romana ‘SS’)
cabidanni 2006