Canzona d’amori
di Gigi Noce


Vogliu cantà pai te fiori d’Abriri
pa ditti cantu mi dori lu cori
mi dori chi mi manca dugna cosa
chi mi dazì che prenda di l’amori
Che prenda di l’amori m’hai dunaddu
carìgni e basgiarèddi diricàddi
e paràuri d’amori innammuràddi
ch’aggiu sarraddu drentu a lu me’ cori

Vogliu cantà pai te fiori meu beddu
chi in cori v’aggiu la marincunìa
marincunìa di candu giobanèddu
currìa più di lu tempu chi currìa
e tu m’hai posthu fattu che la dì
chi curri sempri a basgiàssi lu sòri
ma poi la Notti t’ha furaddu a me
e no t’aggiu pududdu pissighì.

E abà cantu pai te fiori isthimàddu
chi m’hai turraddu a un’althra giubintùra
sanendi chisthu cori isthrazzuràddu
e lizinìddu da la disaùra

Eu t’aggiu amaddu da la prìmma dì
puru si lu me’ cori era cagliàddu
ma tu già l’hai sabùddu cumprindì

e abà no mi nigà basgi abbramìddi
no ricusàmmi carìgni attribìddi
ti vogliu amà lìbara comu sei
i’ li caddèni di li brazzi mei.