Operajos indignatos in sas carreras
curren petinne bonas attivitates
e cossolu de pane caente.
Operajos mutos in punta 'e cuperturas
e cantieris tancatos dae manos malignas.
Operajos isserratos intro su disisperu
che galeottos in prejones vrittorosas.

Como su chelu mutat in notte iscurosa
cuanne machinarios de tessitura,
cannelas de umaticu, turres e minieras
derrutas suta terra, brivas de luche.
Astringhet paris gamas de anzones
e pastores patinne in campos sititos.
Como est notte chi pesat ventu cossu,
munnat astros de dies serenas.

A cudd'ala 'e su mare vartzos mercantes
morican impastos de ingannia.
E oje no iscrio rimas divagantes,
imbenteras de canticos de lunas tunnas,
luchentes, solianas, cumpanzas
de intimos anneos.

Pro cantare chietu ammajos de chelu
paraula non pesat, si meres tramperis
in palas nostras cua cua semenan
tulas de disisperu. E tanno corales
cantemas versos chin rimas cuncordas
de umanitate in afannu in custa terra.

A pustis de custas dies de tribulia,
innida una notte de cunfortu at a sichire,
una notte de lusinga a cara arta,
disizosa de mirare sa luna passizera.

I° Premio nella XX II edizione del concorso di Poesia "Nanneddu Chighine" di Ittireddu: sezione B "Matteo Spensatellu" verso libero 2012. La premiazione è avvenuta il 24 novembre a Ittireddu a cura dell'Associazione Culturale ISSIR.