Cando su primu disizu
di Salvatore Pintore

Cando su primu disizu
si fagheit ojada e piùere
in s'era nostra s'aberzeit unu surcu
e in sa carena ue sos passos current
comente abba chi torrat a sa ena.
Cando su boidu de su chelu
s'ingraideit de istellas
chie intendeit sa prima 'oghe
sa prima làgrima chi ammentat...?
E mentres creschet su tempus chi sarvat,
chie intendet in sa piatta de sas brigas
s'ausentu o sa peràula chi si faghet eventu?
Bolant sas limbas
comente puzones migradores
de 'ucca in bucca e inoghe
su burdellu nos bóltulat e nos cunfundet
mentres frorit de continuu su Sole.
Fogu est su disizu
alambicu su mundu donzi pipia profunda
e paret chi s'oro semus Nois
fizos minores in cust'ispunda
chi no sustentamus de pane e de passiones
de ùmile terra oe malaida sorre
rughe e caminu de sas rivolutziones.
Dae su chelu immérghidu in s'Oju Nieddu
continuant a naschire boghes e boghes...
ma solu lutios de sensu
dae s'anima distillat
chi'est devotu a su Silentziu.

Primo classificato ex aequo al “Premiu ‘e poesia Prantaferru” – Paulilatino, giugno 2010