Cand'as a t'accerare...

di Benito Saba (2006)

Ses mòvidu pitzinnu a passu lentu,
gioghende e apüende, beranile
fis puzoneddu in s'àrvure 'e abrile
cirolitende aniscu a sole e bentu;
dae manzanu chito fit s'apentu
a proare sa parte ch'in sa vida
ti pariat promissa e garentida.

E coitende as bìvidu 'e s'amore
peleas e aficos e pïantu
e gosu e su consolu de s'ispantu
de connoscher a primu 'e su fïore
su rùpere in su sinu criadore
de sa muzere amiga, in sa pastera
custoida cun ànima sintzera.

In s'andera abojadu as meda zente,
calicunu imbudende t'at coladu,
cun átere ti ses acumpagnadu:
s'amigu l'as in coro e in mente,
d'inimigu non cheres oju o dente;
e fit pedrosu e tortu su caminu...
su toppu as aggiuadu e su 'ighinu!

A ue fis andende non l'ischias,
caminare devias, caminare
e sa mezus istrada seberare...
ma solu a orïente fin sas vias...
filonzadu ammirare non podias
a sos montes atesu... pïus mannos
a manu chi passende fin sos annos...

E posca, tot'in d'una, mala e ratta
accolla sa pigada e sa pregunta
da' sas intragnas ásciat a sa punta
de su cherveddu e daghi, manna fatta,
no at resposta, mai est atatta:
ma ite b'at a segus de su monte,
de s'irrùpida rocca a s'orizonte?

E ses prope a su cùccuru 'e s'altura...
Cand'as a t'accerare in s'intrinada,
bisende un''adde frita, morta, iscura...
s'Avrèschida 'e sa Vida in s'Incontrada
as a bider caente, eterna e pura!

Benito Saba


Questa poesia ha conseguito il Premio Speciale "Sardidade" - alla XXV Ediz. del PREMIU LOGUDORO DE POESIA SARDA IN RIMA - OZIERI 2006 - Tema obbligato: "A segus de s'orizonte".