Brujade sos caddos de ferula!
Faghide chi curran sas fiamas
pro totu su chelu 'e Sardigna.
Su liberu cantu 'e sa merula
briosu pienet s'aera
che ispera su coro de s'omine.
Sos bezzos caddos de ferula
fattu han su tempus issoro:
su piseddu fattu s'est omine
e brincat sos fogarones
ch'isse mantessi hat alluttu.
Pius non connoscat padronos,
pius non grusciet su tuju
a su pesante giuale
che sa carena a un'ancuju
li faghet, ancora minore,
fattendelu corpus senz'anima,
vida isvanessida in suore.
Est giustu chi como connoscat
sas paraulas chi alluman
sos coros e lughen in ojos
e in cara comente unu sole.
Brujade sos caddos de ferula!
Faghide chi curran sas fiamas
pro totu su chelu 'e Sardigna.