BONAS URAS

(A fizu meu in sa die chi s’est cojuadu)

Mi paret deris chi cun bona ura,
sos primos passittos t’hap’ insinzadu,
e como già ti miro cojuadu,
cand’ ancora mi pares criadura.

Tue l’ischis, tottu est cambiadu,
Deves attender’ a un altu impignu
de sa femina chi t’hat atzettadu,
deves essere sempre pius dignu.

In domo regnet pagh’ e armonia,
e sa oghe allegra ‘e sos fizos,
bestidelos sempr’’ e sabia ghia,
adduren nidos pius de sos lizos.

Sa fiama ‘e s’amore restet atzesa,
lughida e giara che sos isteddos,
vivedas umpare sana sa etzesa,
cun sos nebodes torrade piseddos.

E crescat forte sa ostra zenia,
e sempr’ ilieret bene fecundu,
e de insinzu fidele lantia
ispargat fiores in tottu su mundu.

Othieri, su vintisese de cabidanni de su duamizaebatoro.

Giovanna Maria Lai Dettori (Ozieri)