Bola Soldadu
di Augusto Piras

Cheas in dogni logu e … disacatu!
Domos derrutas, zente sena fogu;
pitzinnos sena tita, sena giogu.
Sonos de bomba ch’insuldint s’aera;
lampos de lughe chi ‘nd’occhint s’ispera
in cust’inferru de samben baratu.

Boghes de lutos e disisperadas,
manos a chelu chi chilcant azudu:
pregant a Deus cun su coro mudu
ca finas Issu che paret andadu
da custu logu de morte e pecadu
ca si cumandat cun sas fusiladas.

E morint puru sos nostros soldados!
Andant… e totu non ischint pro cosa.
Lassant sos fizos, sa mama e s’isposa
brivos de ghia in mares marranos.
In custu mundu de trastes istranos:
pro ponner paghe che sunt imbiados!

Luntanu ch’andant in terras anzenas
in domo ’e chie non cheret mudare
in sas intragnas e modu’e pentzare,
imboligados in bator lentolos.
Solos si cherent e chi restent solos
In cussu mundu de roccas e renas.

E calchi borta pro sa mala sorte
s’anima torrant da bonos soldados…
Fritos los batint e imboligados
in sa bandela de sos tres colores;
missas e dolu cun tantos onores,
ca sunt eroes… in fatu ‘e sa morte.

E como… bae pitzinnu soldadu
sos pilos d’oro ti ninnat su ‘entu;
curre sos caddos, isprona a crebentu,
bola cun s’abila subra sas nues.
Lassadi andare ca tantu non rues…
Como in su chelu che ses, amparadu.

Glossario
Disaccatu = Disperazione
Derrutas = Dilaniate, disfatte
Mares = marranos Acque senza sicurezza
Trastes = Situazioni
Disaogu = gioco, divertimento
Intragnas = nelle abitudini

Terzo Premio al 21° Concorso di Poesia in Lingua Sarda " SantAntoni de su o'u" di Mamoiada