BIRIMBO'

Chentu caddos giua a bentu
chentu buttones de rosa
in sos pilos chentu olias
chentu e chentu e chentu 'olos

birimbò...si semus solos!

Chentu rios aundados
chentu soles tott'alluttos
de accisu chentu ojadas
chentu e chentu e chentu cantos

birimbò...oh, it'incantos!

Chentu toccos de campana
chentu prellas de lentore
frinas chentu d'ajubore
chentu e chentu e chentu velas

birimbò...ah, cussas melas!

Chentu risos de lidone
chentu rujos pappailes
lunas chentu in cada rattu
chentu e chentu e chentu 'inos

birimbò...ojos divinos!

Chentu janas brinca-brinca
chentu antigas anninnias
d'abes chentu mele 'e oro
chentu e chentu e chentu 'enas

birimbò...dulches cadenas!

Birimbò...a chentu 'oghes
birimbò...a chentu chiterras
birimbò...a chentu istellas
birimbò...a Demì mia
sa prus bella de sas bellas!

Antoninu Rubattu