Bint’annos
di Tonino Fancello

A ‘ue ses andada luna bianca
chi su intinu ruju ‘e pedde’e seda
sos suspiros caentes dae meda
son’isparidos in sa cara franca.

Pares c’appa ziradu s’infinidu
in chimas de sas nues assoladas
e a travuntanas bassas intregadas
sas iscuttas d’amore c’as cundìdu.

Epuru fisti bella e su sentidu
fit coronande sa mamma natura
como onzi priga paret prus madura
interi cara a chizu incanudidu.

Serrados in su coro sos ammentos
son arrumbados de sa zoventude
sutta sa tritzas prenas de virtude
in antigos prus lughidos mementos.

E in chelos artos de sa fantasia
fimis bolande po connosche mundu
una (Frora)’e chimeras a intundu
supra sas musas de sa poesia.

Unu cantaru’e amore una funtana
una ‘ena isticchidda prus madura
fattu e joghittos po chircar’a fura
lughes d’amore in s’anima galana.

E ca t’istimo jeo t’amiro ancora
che crapiola chi melat in su monte
sos pilos chi t’adornana sa vronte
son fattos de ispicas de cudd’ora.

Bolados son che frores de s’edade
sos annos d’unu durche incantamentu
bolados son’in palas de su ‘entu
chin sos birbillios de s’eternidade.

T’ido galu baghiana post’a banda
cà a Deus non si cuat sa fortuna
prima fisti prus bianca d’una luna
e sas laras prus rujas d’una tanda.

Como sa ‘etzesa ghettat su lettolu
chi cucuzzat sa madrighe bellesa
povera…rosa…pares resa resa
chircande sos bint’annos de cossolu.

Segnalazione al “Premio Quartucciu 2009”