Ammenti

Barabàttura di branu

di Benito Saba (2007)

... E fiori e campi e monti
e la Gesgia di lu salthu (*) cu' li fisthoni
e Sassari luntana assuriadda
insunnuridda isthirriadda
e bozi e canti e baddi
e bugli e cionfri e matroffi e ciacchi
e buffunaddi e ragagli e risi
e zi' Antoni allicchiriddu
cun zia Lena furagori indiusaddu...
e zicchirri di criadduri in alligria
e ginocci nudi
acciara-acciara da la faldhetta
di pizzinni chi brincani a la funi,
ebbareddi i' lu pianu immarrazzendi...
un sintori ippantosu isthranu...
è branu!...

... E' festha...
sì, di Nosthra Signora di Maggiu...
Dodiz'anni...
infattu a te l'occi mei, a te,
dui merini azzuddi in pittorra,
peri biondi longhi isciolthi
iparthi,
ùndi i' l'ischina i' l'ipaddi,
barabàttura,
li brazzi toi so ali...
... e vora lu me' cori
cun teggu
i' la frina carignosa
in althu, in althu,
inchiddà, fin'a lu mari!...

___________________
(*) E' la Gesgia antigga di S. Maria (o N. S.) di Paulis (affac'a Uri, sobr'a un'althura da undì si vedi Sassari
e lu mari di l'Aliera). La festha manna è a maggiu e lu puetu s'ammenta chi v'è isthaddu cand'era pizzinnu, isthragnu di un amiggu di lu babbu.

Ricordi - Farfalla di primavera
...
E fiori e campi e monti / e la Chiesa campestre (*) con i festoni / e Sassari lontana assolata / insonnolita sdraiata / e vociare e canti e balli / e celie e frizzi e sherzi e burle / e prese in giro e discussioni accese e risa / e zio Antonio esuberante / con zia Lena rubacuori invaghito... / e grida di bambini in allegria / e ginocchi nudi / affacciati a tratti dalle gonnelle / di ragazzine che saltano alla fune, / puledrine scalpitanti sul pianoro... / una sensazione meravigliosa strana... / è primavera!... // ... E' festa... / sì, di Nostra Signora di Maggio... / Dodici anni... / appresso a te gli occhi miei, a te, / due meline audaci sul petto, / capelli biondi lunghi sciolti / sparsi, / onde sulla schiena sulle spalle, / farfalla, / le tue braccia son ali... / ... e vola il mio cuore / con te / nella brezza carezzevole / in alto, in alto, / là, sino al mare!...

(Menzione d'onore al XX Concorso Letterario "Cullèziu" – Sassari 2007)