Bandidore chin trumba
Antonio Mura Ena 

Su chimbe de su mese 'e sant'Andria,
Corittu, su poeta banditore,
a sas otto 'e manzanu,
at bocatu sa trumba armoniosa.
E at ghettatu su bandu
ch'it 'inita sa gherra vittoriosa.
Et a cantatu in poesia goi:

-Si avertet sa populassione
chi 'erisero est 'inita sa gherra
in chelu, mare e terra.
E in tottue.

-Si avertet sa populassione
sas troppas nostras an picatu a Trento
e 'nche son irbarcatas in Trieste.
S'Austriacu a fine 'e tantu istrughere
tzedit sas armas e benit a rughere.

-Si avertet sa populassione
chi venzat tottucanta a su Tedeu.
e a sa portessione.

-Si avertet sa populassione
chi 'eris a manzanu,
a s'essita 'e sa missa
m'an datu notissa
chi est mortu Bostianu, su 'izu meu.
Si avertet sa populassione
chi venzat tottucanta a su Tedeu.