Babbu,
aiat pessos ladinos.
peràulas medidas, giagadas
e manizos addajados,
graes de fadigas.

Babbu,
aiat manos mùrinas,
cossumidas, lantadas,
ojos istasidos,
in colore 'e pedra fùmiga
e bestes infustas
de suore e de piùere.

Babbu a s'intrighinu
fit una pedra istracca,
chi lorumaiat alenu alenu
in s'impedradu 'e sa vida.
Mustraiat semos de ferru
brujaduras de ruinzu e ludu 'e riu.

Babbu,
fit unu monte 'e sacrifìtzios,
ue cuaiat guvardu
siendas de bonu e ameddos.

Ma deo l'apo
cumpresu solu cando...
chimentadu e tutadu
s'isérghida
l'at aggarradu...
caminu chena tempus,
addae... agherju imbertu 'e mudesas.

III premiu in su Cuncursu de poesia" A pes de Santu Padre" 25 de Santu Aine 2015 Bortigale