Asula Cantone
di Giovanni Piga

Murmuttan solidade sas paràgulas
a su sinnu 'e sas pupias
pissichias da e sos bentos de sa duna.

Oh! Amore de disizos campanzos
arpilias mi ponet
su pessamentu ebbia
d'una carinnu tuo 'e mudesa.

Sa boche tua tremet galu
a s'ammentu de dies pizzinnas
issaghinadas d'affettu.
Froghedda d'impuddiles de oro
intesses sos manzanos
chin asulas cantones
nuscosas de turmentaos risittos.

No, non faveddes!

Lassa chi s'ocrada tua
mi trapasset sas carres,
mi currat in sas benas
che traghinu de predas alluttas
e che picchet impettus sos disizos:
cussos disizos de luche e de umbras
chi mi gramuzan s'ispiritu...

Oh!, si fipo istau poeta!

Haia furau sos alores a su sole
sos umores a sa luna
sos colores a sos arcos de chelu,
pro cumponner nuraches de amore
chin versos lucorosos
intrizzios de galanos carinnos
pro t'iscrarire sos passos
in s'andala 'e sa bida.

Ahi! Cantu predosu m'est custu bolare.

Ma tue, non faveddes!
Lassa chi sian sos puzones
chin notas uguales
a cantare sa pena e s'amore
a sa mutria 'e sos astros.

In sa traschìa de sas nottes meas
mi bastat pezzi de intendere
su prachidu alenu de su coro tuo 'e
beranu.

S'anima tua est bestia 'e sole
de su matessi sole chi respiro....