Anninnia pro una criatura marturia
di Lorenzo Pusceddu

(Precadoria)

Anninnia anninnia
dormidi prenda mia,
prenda mia de su coro
Deus meus t'onoro,
Deus meus ti prego
a Ninnu ti l'intrego,
pro lu poder sanare
jeo t'apo a donare,
totu s'amore meu
su coro tot'intreu,
e si cheres, sa bida,
cust'animedda nida
lassamila campare,
devet galu bisare
una bida de cuntentos,
e de custos ammentos
isse potat contare,
lassamilu durare
a su fedu de mannoi,
si li sanas sosoi
torrarabilu su risu,
daemilu s'avisu
si tue m'as ascurtadu,
Deus mes istimadu
si ti devo adorare,
no mi facas cantare
semper cust'anninnia,
dormidi prenda mia.

51° Città di Ozieri - 4° premio ex aequo