Bete berveghes nieddas... fieras,
in unu mare a cogorostas alzas,
curren e prenant altas cuilarzas
fintzas a suer lórigas de aèras1
cun manos impigadas de majarzas
tra frunzas imprelladas de Su Moju
e Cucuru De Lunas,2 tristu fadu,
imbolat ludu a lacos, isfrenadu...
Làstima, a l'ider no acudit oju
chi no apat dae coro lagrimadu.
Dae cussorzas totu a beraniles,3
falan rios a Seddas De Sa Dea. 4
De corrutos, isprammos e pelea,
trazant cun late, pane in areniles
pro dare sale a bambos de sa rea
rèbula rassa de sutzu meladu,
chi aveltein cando gia nadende
tra sa natura chi che fit furende
su chi sos meres che l'aian furadu
a bentres mannas e laras riende.
Como Torpè si lingat donzi ferta
in lìberos trainos tra ozastros
cun èligas umbrosas pro pilastros
e pro cimentu, murta e tiligherta,
frenos a bramas de noos disatros
cuados dae basos de progressu
vile, pro pitzinnia disgrasciada
briva de sas incunzas de s'annada
o peus chie tempus at arressu
in s'aposentu de malefadada.5
A'uras benzan de abba cumpanza
torrend'in lacu... e cogher s'ambidda
in festas cun sos fizos de sa bidda
retzende cantu pius zentes istranza.
Sas brajas de Antoni6, un'ischentidda
mandent in chelu pro bos ardiare
da nues, neos e mal'iscalmentu...
Nostra Signora e Anghelos7, s'ammentu
lasset a chie no deet ismentigare...
Ma fraighet chen'arriscos de turmentu.

1 s'orizonte -
2 duos montes de Torpè -
3 Arados dae s'abba pro s'incuria -
4 sa zona de sa diga -
5 Sa vitima disabile -
6 su foghilone chi faghent in piata pro sant'antoni -
7 Sa patrona de Torpè

3° Premiu de poesia Torpè (Pro no ismntigare s'alluvione: 18 de Sant'Andria 2014)