Animas
de Gonario Carta Brocca

Iscrio e isetto
no isco ‘ene ite?...
Ma iscrio e isetto
in custu pasadorzu
ue boidu e fritu
mi cranculan su coro...
A intundu
presoneras de su mundu
animas de carre imboligadas;
de carres tirchinadas
dae su tempus chi cattigat e umiliat
dozas e lussos semenende...
In gurgos chene sole
ue sos deos no colan mancu ‘e passu
sas impiedosas sannas
de bobois de ferru e tzimentu
animas solas istan gramuzande;
animas chi su ‘entu ch’est leande
e istichinde
in sas prigas iscuras de sa vida.

Animas chene paghe e chene pane
animas chene limba
nen zustissia
presoneras
de s’arcanu ‘e s’esistere
tra mareas de faulas afranzosas
e istoccadas de ranchia veridade
chi sos ohis istratzan dae petorras
e sos ohis a sa terra
d’amacchios amacchiada...

In cust’irvaliu mannu
jeo iscrio e iseto
no isco ‘ene ite?...
Ma iscrio e isetto
intas a cando
animas chen’anima
biven furande s’anima a su frade
biven furande s’anima a sa terra...

Romana 2013 Prèmiu poesia sarda “Tiu Finu“