Furadu m’an sas alas, sas biancas
de cudda lestra lestra pitzinnia,
sa chi sonniait incunza ‘e galania
semenande in su coro birdes tancas.

Cando colao a bolu in sas carreras
peri benes e males de Sardinna
cando zuighe e ispada fit sa pinna
e parian sas cosas prus bragheras.

Sas promintas de vida accaenturadas
parene bive’ como in sos amentos
e sas visiones d’ateros mementos
s’istraman tra medallas ruinzadas.

Totu m’apo castadu, ocros e coro,
in milli ‘anzelios de sa veridade;
pazinas de zustissia e libertade
d’illusiones oarrande unu tesoro.

Com’est pasande cudda chirca manna
de paraulas e sonos e sentidos
chi paris chin sos annos son fuidos
a cudd’ala ‘e s’arcanu d’una janna.

Chi non bincana nudda e boidore
li dimando a su male de sa vida
ne mai arrumbet s’anima sidida
de s’arcanu fecundu de s’amore.

In andala astraada, solu solu,
cara a n-ue morit sole ando pianu;
pariat eris ... s’eris est lontanu ...
e su tempus leandemi est a bolu.

Mi leat a bolu chene m’iscapare
in sas arturas chene torradortzu.
In cale chelu, in cale s’iscusorzu?
In cal’’isteddu amparu ap’acatare?

In su caminu istranu de sa sorte
b’at unu frore iscuru e tosconosu
chi donni’omine rendet timorosu
cando s’intendet s’alinu ‘e sa morte.

A passu lentu sigo a avantare
tzertu chi su caminu at a finire
e finat pruere, famene e patire
in chelos inue totu an a pasare.

Terza classificata al concorso di Poesia “Quartucciu 2008”